طلعت ريحتكم دعت المواطنين الى التلاقي في عيد الاستقلال في ساحة. | عقدت حملة "طلعت ريحتكم" مؤتمرا صحافيا في ساحة الشهداء دعت فيه المواطنين الى "التلاقي في 22 تشرين الثاني في ساحة الشهداء رافعين علم لبنان فقط"، وتلت حنان ابي رميا بيانا قالت فيه: "هيدي السنة رح يجي عيد الاستقلال بعد ما اتهموا المتظاهرين انهم تابعين لجهات خارجية، ام لجهات داخلية ليقسموا الشارع بينما هني واضح ارتهانن للخارج، بس لانو الحقيقة بدها تبين ولو شو ما صار، ولانو "طلعت ريحتكم" كانت المحرك الاساسي لحركات شعبية مستقلة، وبعيدة تماما عن ريحتكم، وبعيدة تماما عن التبعية، وبتمثل الصوت الحقيقي لكل لبناني مهما كانت انتماءاته وبغض النظر عن مصالحه الشخصية والطائفية والايديولوجية والحزبية، نازلين لنلاقي الكل: المواطنين وبقية المجموعات بساحة الشهداء يوم عيد الاستقلال ب 22 تشرين الثاني الساعة 12 الضهر رافعين بس العلم اللبناني، نازلين لنأكد انو المعركة بعدها مفتوحة مع السلطة السياسية الفاسدة لنقدر نوصل لحل ادارة ازمة النفايات الصلبة، لانو امن المواطن الصحي والبيئي ما بيحمل استغلال، نازلين لنطالب بالاستقلال عن استغلالن!". واضافت: "نازلين الاحد لنفرجي انو مطالبنا من اول يوم لهاللحظة ما تغيرت. بدنا تجتمع الحكومة وتقر مراسيم وقرارات بتضمن تطبيق خطة بيئية وصحية للنفايات، ومحاسبة الوزراء المقصرين والافراد بهالملف، نازلين الاحد لاننا مؤمنين انو التغيير حتما جايي، ولا بد من اعادة الحياة الى المؤسسات الدستورية. نازلين لانو بدنا دولة، بدنا استقلال حقيقي، استقلال عن استغلالن!". وتابعت: نازلين الاحد ومنتمنى على كل نقابة، كل جامعة، كل بلدية، كل صاحب، شركة كل عامل، طل طالب، وكل مواطن يكون هوي كمان منشارك الاحد لان كلنا يعني كلنا معنيين بإنو نطالب بالاستقلال عن استغلالن". وقالت: "من نحنا وزغار كنا ننطر يوم عيد الاستقلال لنوعى بكير كتير مع انو يوم عطلة لنفتح التلفزيون ونحضر العرض العسكري، هيدا اليوم كان يمثل لإلنا مشهدية بتخلينا نحلم بدولة مدنية بتجمعنا كلنا، بيحكمها سياسيين نضاف، وبيحمي حدودها العسكر، بس هالسنة رح تكون السنة الثانية عالتوالي يللي ما رح نقدر نحضر فيها اي عرض لانو ما في رئيس للجمهورية، وليه ما في رئيس؟ لانو في مجلس نيابي قرر يمدد لحالو مرتين ويتقاعس عن انتخاب هالرئيس، تماما متل ما تقاعس هالنواب عن اجراء انتخابات نيابية وفق قانون بيضمن صحة تمثيل الشعب اللبناني، وكمان تماما متل ما تقاعسوا عن اقرار قوانين بتحسن حياتنا كمواطنين، وعن مراقبة اداء سلطة تنفيذية اسما مجلس وزراء (هني ذاتن من نفس الكتل التي بتشكل البرلمان)، وبالتالي يطمرونا كلنا سوا كشعب بالنفايات بعد ما حرمونا من ابسط حقوقنا". واضافت: "هيدي السنة رح يجي عيد الاستقلال بعد ايام من انفجار ارهابي راح ضحيتو اكتر من 40 مواطن لبناني، من دون ما تشعر السلطة السياسية بأي حرج، فقامت بنفس الوقت بتشريع استدانة 4 مليارات دولار زيادة بينضافوا للدين العام، وطبعا ببازار سياسي وبحسب ما صرح احد النواب "بعصفورية"، وهيدا طبعا لأنهم ما بيفهموا الا بلغة الاستقلال". وختمت: "هيدي السنة رح يجي عيد الاستقلال بعد اسابيع من التظاهرات التي اخرجت المواطت اللبناني لاول مرة عن طوع زعماء الطوائف ومصالحهم وشعاراتهم، فقررت السلطة ان تواجه المتظاهرين بالقمع والتخويف التخوين والاتهامات وبشد العصب الطائفي، مع انو الزبالة والامراض التي نتجت ورح تنتج ما بتفرق بين مواطن والتاني، وطبعا هيدا الشي صار لانو القيمين على السلطة ما عندهم مشكل يموت الشعب ويمرض كل ما هني على كراسيهم ولانهم ما بيفهموا الا بلغة الاستغلال".

Tripoli Scope - أخبار طرابلس لبنان - Lebanon News Now 24 | تريبولي سكوب - موقع طرابلسي يتفرد بتسليط الضوء على مدينة طرابلس خاصة والشمال ولبنان عامة. طرابلس ، لبنان ، تريبولي سكوب ، أخبار... - Akkar,lebanon,tripoli,tripoliscope,news,scope,north , Lebanon, News, Middle East, Lebanon News, Middle East News, News in Lebanon, Breaking News Lebanon, Lebanese news portal, Politics, Economy, Sports, Entertainment لبنان ٢٤، لبنان، أخبار، الشرق الأوسط، أخبار لبنان، أخبار الشرق الأوسط، خبر عاجل لبنان، سياسة، إقتصاد، رياضة، ثقافة

Back End Admin
 
تواصل معنا
        
خاص بالإعلانات
آخر الأخبار
 

خاص الموقع