الجمعية البيئية شرحت خطتها للنفايات :للتحرك السبت | عقدت "الجمعية البيئية اللبنانية" مؤتمرا صحافيا في مبنى "الحركة البيئية" في بعبدا، في حضور مجموعات الحراك المدني (طلعت ريحتكم، من اجل الجمهورية، الحراك المدني الديموقراطي، بدنا نحاسب وحراك الجبل) وممثلي الجمعيات البيئية وغيرها من مجموعات الحراك، وأصدرت بيانا عددت فيه مشاكل النفايات وخطتها البيئية التي قدمتها الى رئيس الحكومة تمام سلام، داعية الى مشاركة مجموعات الحراك في تحركهم نهار السبت في ساحة رياض الصلح. وجاء في البيان: "7 شهور تقريبا، والزبالة بعدها بالشارع شو السبب؟ في حكومة كانت عارفة أزمة النفايات جايي من أكتر من سنة قبل تسكير مطمر الناعمة.. كرمال هيك لازم الكل يعرف إنه سبب الأزمة والأمراض الناتجة عنها هني الأشخاص اللي بالحكومة ومش أي حدا تاني! وبعد الأزمة، طمروا راسهم متل النعامة بالأرض لحد ما خرجت الناس تطالب بحل.. طبعا تم قمع أصوات المتظاهرين، وتهديدهم، وتخوينهم.. وبعدها الزبالة بالشارع! وبلشت الحكومة تقدم حبوب مخدرة للمواطنين اللبنانيين من دون ما تقترح حل بيئي وصحي واقتصادي. بلشوا برفع الزبالة من الشوارع ويرموها بالأنهار والغابات من دون أي تفكير بالضرر عالمياه الجوفية والتربة.. بعدين الحكومة غمضت عيونها عن حرق ممنهج للنفايات من دون أي تفكير بالضرر والتلوث الجوي وأثره على صحة الإنسان! بعدين إجت خطة "أيلول" اللي عرفت بخطة "شهيب"، خطة ما تم تطبيقها لأن وبحسب تصريح الوزير "شهيب" ما اتفقوا على شو بيطلعلهم! وكل اللي طالب فيه الحراك والحركة البيئية بوقتها هوي عقد جلسة حكومية بتحول الخطة وتعديلات عليها لمراسيم وقرارات.. حتى اضطرت مجموعات الحراك تروح توعي الرئيس سلام ليعقد جلسة حكومية.. كل دول العالم بيتظاهروا ضد شغل الحكومة، نحنا بلبنان كنا يمكن أول ناس عم نتظاهر لتشتغل الحكومة! للأسف الحكومة ما خلت تناقض غير ما عملته: 1- بأيلول 2015 قالوا إنه معملي الكرنتنيا والعمروسية اللي قادرين يفرزوا 2850 طن/نهار حسب تقرير sweep net بسنة ال2014.. وبعدين صاروا فجأة هالمعملين هني الأساس بالفرز بعملية الترحيل بكانون الأول 2015. 2- بأيلول 2015 قالوا إنه الزبالة اللي بالشارع ما بتنفرز.. وبعدين وزير الزراعة اللي مستلم ملف النفايات قال بكانون الثاني 2016 بحلقة كلام الناس إنه 70% منها بتنفرز. 3- الها الحكومة سنين تقول ما في تمويل كافي لإنشاء معامل فرز وتدوير.. وفجأة صرنا بدنا ندفع من جيبة المواطنين أكتر من نص مليار دولار لنرحل الزبالة لسنة ونصف بس! 4- الوزراء وعدوا البيئيين إنه ولا ممكن ينحكى بتشريع المحارق بلبنان بسبب أثرها الصحي والبيئي، وبقرار كانون الأول بلشوا يحكوا عن محارق بالحل الطويل الأمد! اللي ما بدها الحكومة تسمعوا هوي اللي عم بتطالب فيه الحركة البيئية والجمعيات البيئية من سنين واللي عم بتطالب فيه للبنان كله ومش بس لمحافظتي جبل لبنان وبيروت.. يوم تشكيل الحكومة الحالية ب15 شباط 2014، تم تقديم خطة Trash to Cash الممضية من عشرات الجمعيات البيئية وفيها خطة طويلة الأمد لحل أزمة النفايات البلدية الصلبة، وتقدمت لوزير البيئة وبقيت بالجارور! هيدي الخطة وحدة من عشرات الاقتراحات اللي تقدمت لوزارة البيئة من عدة جمعيات وكلها انضبت بالجارور.. اللي عم نطالب فيه واللي مش قبلانة الحكومة تمشي فيه هوي الإعتماد على الفرز والتدوير.. ليه؟! هيدا المستند الصادر عن تعميم وزارة البيئة بتاريخ 16 تشرين الثاني 2015 بيقول إنه النفايات العضوية نسبتها 50%، بينما النفايات القابلة للتدوير نسبتها 35% يعني جزء كبير من النفايات المنتجة ممكن معالجتها على الاراضي اللبنانية بطرق صحية وبيئية بس للاسف ما في إرادة سياسية.. ولمن واجهنا السلطة بهيدي الأرقام، قال البلد مش مجهز.. منشان هيك لنأكد عن جدوى خطتنا، بلشنا كحركة بيئية وكمجموعات بالحراك الشعبي جولة بمحافظات بيروت وجبل لبنان والنبطية والجنوب وزرنا عدد من معامل الفرز، والتدوير، والتسبيخ المملوكة من الدولة والقطاع الخاص ومن بينها معامل ممولة من الاتحاد الأوروبي ومعظمها شغال واللي متوقف هوي بسبب فساد اداري ام سياسي، وممكن تتشغل بكلفة قليلة.. واللي استطعنا تأكيده بهالجولة هوي التالي: 1- بالإمكان تدوير الكميات التالية على كافة الأراضي اللبنانية: أ- 500 طن من الورق والكرتون يوميا (بحسب نقابة صناعيي الورق في لبنان) من أصل 900 طن ينتجون يوميا (تقرير sweep net - نيسان 2014) وبالإمكان رفع هالنسبة! ب- تصدير 300 طن يوميا أي الكمية الكاملة من نسبة المعادن في النفايات البلدية (بحسب تقرير sweep net - نيسان 2014) ج- 60 طن يوميا من الزجاج الشفاف (معمل Soliver ) من أصل 200 طن منتجة يوميا (تقرير sweep net - نيسان 2014) د- 400 شركة معنية بتدوير البلاستيك (تقرير جمعية الصناعيين اللبنانيين) وهيدي لائحة بالمراكز اللي بتستخدم المواد القابلة للتدوير وعناوينها صادرة في تعميم وزارة البيئة ب 16 تشرين الثاني 2015. يعني فينا نستوعب حوالي الألف طن يوميا من المواد المفرزة والقابلة للتدوير في المنشآت الحالية في كل لبنان، ويتبقى 950 طن من النفايات المفرزة التي يمكن تصديرها لا ترحيلها، وبالتالي بيعها لا الدفع عليها! المؤتمر اليوم هوي للحركة البيئية وجمعيات بيئية لطرح توصيات عامة بعنوان واحد "التدوير" ممكن تشكل مدخل حل أزمة النفايات ومشارك معنا ممثلين عن مجموعات الحراك اللي بيعتبروا اقتراح الحركة البيئية واقتراحات بيئية أخرى هي المدخل الصحيح للحل.. الحركة البيئية والجمعيات البيئية وضعت توجهات عامة وقعت عليها حتى الآن اكثر من 220 جمعة بيئية وأهلية بـ 25 بكانون الأول 2016 وتم تسليمها لرئيس الحكومة تمام سلام .. وما اجا رد حتى الحظة وهيدي التوجهات كما يلي: - انشاء خلية أزمة في كل قضاء! يمكن صار الوقت الدولة اللي بتحترم مواطنيها تفكر بصحتهم وصحة اولادهم. هيدي الخلية بتختار مواقع في كل قضاء لتخزين النفايات المتراكمة بالشوارع من 7 شهور بطريقة صحية تضمن عدم تسربها للمياه الجوفية على إنه يتم فرزها بعد فترة! - هيدي الخلايا كمان لازم تلاقي مواقع كسارات ومرامل بالقضاء وممكن تستفيد من اللائحة اللي أعدها مجلس الإنماء والإعمار بسنة ال2002 لكسارات ومقالع مفروض بالقانون اعادة تأهيلها لتستقبل العوادم - تشغيل وتطوير كل معامل الفرز والمعالجة في لبنان، وخصوصا اللي ممولة ومتوقفة عن العمل (19 معمل فرز وتسبيخ بحسب دراسة Sweep net 2014)، كذلك إنشاء معامل جديدة كلفتها أقل كثيرا من كلفة الترحيل - البدء بعمليات الفرز والتسبيخ.. وبيع المواد المفرزة القابلة للتدوير وفقا لما ذكر أعلاه، وتوزيع المواد العضوية التي تم معالجتها كمحسن للتربة. - اما ما تبقى من نفايات فبالإمكان الحديث عن طروحات لمعالجتها ولكن بعد أن نكون قد خفضنا مبالغ طائلة على المواطن اللبناني! التوجهات العامة اللي عم نطرحها مقبولة بيئيا، اجتماعيا واقتصاديا.. بيئيا لأن بتحافظ على صحة اولادنا وعلى جمال بلدنا اجتماعيا لانها ما بتعتمد لا على الطامر الكلي، ولا الحرق الكلي، ولا على الترحيل الكلي للنفايات.. وإقتصاديا لانها مبنية على مبدأ ادارة الموارد والإستفادة منها ومش على ادارة النفايات والتخلص منها. وهيك كمان، بالمصاري اللي منوفرها بـاعتماد التوجهات العامة اللي عم نطرحها، ممكن نوفر كمية أموال كبرى ممكن تستخدم من قبل الحكومة لتمويل مطالب محقة أخرى مثل موظفي الدفاع المدني، وسلسلة الرتب والرواتب. كمان مندعي المواطنين لدعم كل تحرك موجه للضغط على الحكومة لاعتماد الحلول المستدامة.. ومن ذكر الحكومة والقوى الأمنية بواجبها حماية المتظاهرين وتأمين حقهم الطبيعي بالتعبير عن رأيهم. لكل ما سبق مندعي اللبنانيين واللبنانيات لرفض خطة الترحيل المرتقب توقيعها السبت 6 شباط والمشاركة في المظاهرة بنفس النهار بـرياض الصلح للمطالبة باعتماد خطة تعتمد على الفرز والتدوير"

Tripoli Scope - أخبار طرابلس لبنان - Lebanon News Now 24 | تريبولي سكوب - موقع طرابلسي يتفرد بتسليط الضوء على مدينة طرابلس خاصة والشمال ولبنان عامة. طرابلس ، لبنان ، تريبولي سكوب ، أخبار... - Akkar,lebanon,tripoli,tripoliscope,news,scope,north , Lebanon, News, Middle East, Lebanon News, Middle East News, News in Lebanon, Breaking News Lebanon, Lebanese news portal, Politics, Economy, Sports, Entertainment لبنان ٢٤، لبنان، أخبار، الشرق الأوسط، أخبار لبنان، أخبار الشرق الأوسط، خبر عاجل لبنان، سياسة، إقتصاد، رياضة، ثقافة

Back End Admin
 
تواصل معنا
        
خاص بالإعلانات
آخر الأخبار
 

خاص الموقع